പ്രശ്നോത്തരി

എന്തെല്ലാം തടസ്സങ്ങൾ

ഉത്സവമില്ലെന്നാലും, കള്ളേറെ മോന്തിപ്പിള്ളേർ
ഒച്ചവെയ്ക്കുമീ ഗ്രാമമുറങ്ങാറില്ലാ രാവിൽ.
വീഥികൾ കടകളു, മുറങ്ങീടിലും, സദാ
ക്രോധത്താൽക്കടുത്തോതുമമ്മ കണ്ണടയ്ക്കില്ലാ.
ജയിൽ പോൽ പൂട്ടിക്കാക്കുമമ്മ കണ്ണടച്ചാലോ,
വരുമേ കൺ പൂട്ടാത്തോർ, ഗ്രാമത്തിൻ കാവൽബ്ഭടർ.
വേലേന്തും കാവൽക്കാരുറങ്ങിയാൽ, വലഞ്ചുഴി-
വാലാർന്നു ദംഷ്ട്രംകൂർത്ത നായ് കുരച്ചെത്തും മുന്നിൽ.
കുരനായ് കുരയ്ക്കാതെ വീണുറങ്ങിയാ, ലപ്പോൾ
പകൽ പോൽ നിലാവുതിർത്താകാശമധ്യത്തിങ്കൽ
വിസ്തൃതം കാണാം ചന്ദ്രമണ്ഡലം; ചന്ദ്രൻ താഴെ-
യസ്താദ്രി പൂകിക്കൂരിരുട്ടെങ്ങും കനക്കുകിൽ,
യക്ഷികൾ നടക്കുമായാമത്തി, ലെലികളെ-
ബ്ഭക്ഷിയ്ക്കാൻ വലിയ വായ് പിളർന്നെത്തീടും കൂമൻ
ഉൾത്തടം നടുങ്ങുമാറലറും; കൂമൻ പൊന്ത-
ക്കാട്ടിൽപ്പോയ്ക്കരയാതെ കൺചിമ്മിയുറങ്ങിയാൽ,
അഴകായ്ക്കൂകും വീട്ടിൽ വളരും പൂവൻകോഴി;
ഒരു നാളീവിഘ്നങ്ങളൊക്കെയുമൊഴിഞ്ഞെങ്കിൽ,
അടക്കമില്ലാനെഞ്ചിൽ വാഴുമദ്ദേഹം കുറി-
ച്ചിടത്തു വരികയി; ല്ലാകയാൽ പ്രിയസഖി,
അകമേ തരിയിട്ടുകിലങ്ങും ചിലമ്പാർന്നു
നെടുകേ പായുന്നതിൽപ്പേർകേട്ടോരശ്വങ്ങളും
ചുഴലും മതിൽക്കെട്ടു വിയലും തിത്തൻ നൃപ-
നമരുമുറന്തയാം രാജധാനിതൻ ചുറ്റും
പാറകളുയർന്ന കാവൽപ്പുറങ്കാട്ടിൽപ്പോലെ
ഏറെയുണ്ടല്ലോ വിഘ്നമെൻ ഗൂഢപ്രണയത്തിൽ.


ചോദ്യം: ഇതിന്റെ കവി ആരെന്നുൾപ്പെടെയുള്ള വിവരങ്ങൾ അറിയാവുന്നവർ എഴുതൂ. (ഒരു “കുളു” -- ഇതൊരു തർജ്ജമയാണ്.)

ശരിയുത്തരം എഴുതിയറിയിയ്ക്കുന്നവർക്ക് മായാ സോർട്ടെക്സിന്റെ വക ഒരു ചാക്ക് ഉമി, ആൻ‍ഡമാൻ ജൂവലേഴ്സിന്റെ വക 0.0001 ഗ്രാം സ്വർണ്ണം, ഹിമാലയാ ചിട്ടിഫണ്ട് വക ഒരു ഗിഫ്റ്റ് വൌച്ചർ മുതലായവ കിട്ടാൻ സാധ്യതയുണ്ട്.

ഉത്തരം:സംഘസാഹിത്യത്തിലെ പ്രശസ്തമായ് അകം കവിതകളിലൊന്നാണിത്. മൂലകവി പരണർ. വിവർത്തകൻ എൻ വി കൃഷ്ണവാരിയർ.